ꯁꯤꯖꯤꯟꯅꯔꯤꯕ:Mayek Bot/Test/Bangla/সোয়াম্ নীঙোল্ কাংজম্ ওংবী স্বীতী
সোয়াম্ নীঙোল্ কাংজম্ ওংবী স্বীতী অসী ꯕꯦꯡꯒꯂꯤ ꯃꯌꯦꯛ:মীতৈলোনগী মমী কুম্হৈ সক্তম্ লাংবী সীনলোই অমনী ।[꯱]
পুন্সী ৱারী
[ꯁꯦꯝꯒꯠꯂꯨ | ꯁꯦꯝꯒꯠꯂꯛꯄꯒꯤ ꯍꯧꯔꯛꯐꯝ]গুৱাহাতীগী গনেসগুরীদগী পোক্খীবা অমসুং পুরক্খীবা স্বীতী অসী জগোই, ইসৈ-নোংমাই, ফম্বাক্ কুম্হৈ অমসুং মমী কুম্হৈসীং য়াম্না পাম্মী। মহাক্ অসামীজগী বীহু জগোইদা ফজনা মরাল্ লৈতে, অসামীসা ইসৈসীং য়াম্না ফজনা সক্ই। মহাক্কী খোনজেল্ নুংসীবা খোনজেল্ অমসু লৈ। মহাক্কী স্কুল্গী মতম্দা স্বীতীনা স্তেজতা জগোইগী তোঙান্-তোঙান্বা মওংসীং পাংথোক্খী, মহাক্না থৌরম্ কয়াদা ইসৈসু সক্খী। অদুবু মহাক্ জগোই অমসুং ইসৈ-নোংমাইগী মতাংদা মহাক্কী থবক্সীংদা পেন্দে। মহাক্কী অমৎতা ঙাইরবা পান্দম্ অমসুং অপাম্বদী মনীপুরী মমী কুম্হৈসীংদা মমীরোই অমা ওইবনী। অদুবু মীওই অয়াম্বনা অসামীসা অমসুং বেংগোলীগী মনুং চন্বা য়াম্না তোঙান্বা ফুরুপ্ অমা লৈবনা মরম্ ওইদুনা কৈদৌনুংদা পান্দম্ অদু ফংখীদে। মহাক্ অসামীসনা নম্না লৈবা মফম্ অমদা পোক্খীবনা মরম্ ওইদুনা মহাক্না মহাক্কী পান্দম্ অমসুং অপাম্বা অদু মপুং ফাহন্নবা লম্জীংবীগদবা মীওই অমা থীবা ঙম্খীদে। মখোইগী মনাক্ নক্পদা লৈরীবা ফীভম্ অদু খংলদুনা, মহাক্কী মমা-মপানা মহাক্পু মহাক্কী পান্দম্গী লম্বীদা মখা তানা চংসীন্বা য়াহনখীদে। মহাক্কী মমা-মপাগী ৱাফম্ অদু য়াদবনা মহাক্পু য়ানীংদবা অঙাং অমা ওইনা চৈরাক্ পীবা ঙম্মী।[꯱]
মহাক্কী মমা-মপানা মহাক্পু ফাওবা মাইথীবা পীখী। মহাক্কী মমা-মপানা স্বীতীগী অপাম্বা অদু হোংদোক্পা ঙম্খীদে। মদুগী মহুৎতা মহাক্না কৈদৌনুংদা অতোপ্পসীংগী মতেং অমৎতা য়াওদনা মহাক্কী হৈথোই-সীংথোইবসীং উৎনবা প্লেৎফোরম্ খুদীংমক্ মাংহনখীদে। য়াম্না চীন্বা অমসুং লাওবা গুৱাহাতীদা কলাগী মওংসীংদা মসানা মসাবু চুম্মী হাইবগা লোইননা স্বীতীগী নুংঙাইরবা পুন্সী অমগী খোংচৎ অদু লোইসীল্লী। মহাক্না ইং ২০০৫দা গুৱাহাতীগী মারীয়া মোন্তেসোরী স্কুল্দগী মেত্রীক্ লোইরবা হেক্ মতুংদা য়াম্না অঙাং ওইরীঙৈদা কাংজম্ অমরগা লুহোংখী। মমী কুম্হৈসীংদা সক্তম্ লাংবগী মহাক্কী পান্দম্দী মহাক্না লুহোংলবা মতুংদসু মহাক্কা লোইননা লৈখী। অদুবু ঐখোইগী খুন্নাইদা লুহোংলবা নুপী অমগী থাক্ অসী মহাক্কী মমী কুম্হৈসীংদা সক্তম্ লাংবগী অপাম্বা অদু ফোংদোক্পদা অপন্বা অমা ওইখী। স্বীতীনা মমী কুম্হৈসীংদা মহাক্কী পুক্নীং হুনীংঙাই ওইবগী মতাংদা ৱারেপ্ লৌবা অসীনা অরোইবদা মহাক্কী মপুরোইবা অমসুং ইমুং মনুংগী মীওইসীংবু মহাক্পু সৌগৎনবা ওন্থোক্পা ঙম্গনী। সরমীলানা মহাক্কী মচীন্-মনাও থোক্পগী মচে অমনা স্বীতীগী অপাম্বদা নীতীগী ওইবা মতেং পাংঙী। মসীগী মতেং পুম্নমক্ অসীগা লোইননা স্বীতীনা অঙাং ওইরীঙৈদগী হৌনা মহাক্কী মংলান্ অদু কেমেরাগা মায়োক্নহনখীবা মতম্দা তসেংবা ওইরক্খী। মহাক্না নুমীৎ অদু হৌজীক্সু নীংসীংলী; মসী ইং ২০১৪গী জুন্ ১৪দা ওইখী। স্বীতীনা মমী কুম্হৈ 'অমুক্তা অনী'গীদমক্ অতেন্বা মতম্গী ওইনা লুহোংলবা নুপী অমা ওইনা ইচম্ চম্বা থৌদাং অমগীদমক্ কেমেরাগা মায়োক্নখী। মমী কুম্হৈ অসী রোমী মৈতৈনা লম্জীং-লম্তাক্খী। মীকুপ্ অদুমক্ স্বীতীগীদমক্তা খ্বাইদগী নুংঙাইবা মীকুপ্ ওইখী।[꯱]
মসী মমী কুম্হৈ অসীদা মহাক্কী সক্তম্ লাংখীবা অদুনা নৎতে অদুবু মসী মহাক্কী অপাম্বা অদু অহান্বা ওইনা মপুং ফাহনখীবা মীকুপ্ অমা ওইবনা ওইখী। মতুংদা, অমরা রাজনা লম্জীং-লম্তাক্খীবা মমী কুম্হৈ 'তাসা নাংতানী'দা ওলেনগা লোইননা কুম্মীন্নখী। মহাক্না আই.এস.তী.ভী. নেৎৱার্ক্তা সন্দোক্লীবা অচৌবা তী.ভী. সীরীয়েল্ 'চৈনাখোল্'দা পুলীসা কমান্দো অমগী লোইনবীগী সক্তম্ লাংখী। মহাক্না মখা তানা সুধীরা কাংজম্না লম্জীং-লম্তাক্খীবা মমী কুম্হৈ 'জম্ মখোং'দা ওজা অমগী সক্তম্ লাংখী। মহাক্ অনৌবা ফোংবা মঙা হেন্বদা উবা ফংগনী। মহাক্কী লাক্কদৌরীবা মমী কুম্হৈসীংগী মনুংদা, মহাক্ সমানন্দনা লম্জীং-লম্তাক্খীবা মমী কুম্হৈগী মীংথোল্ 'লুখোই ওইনা'দা লেদী দোক্তরা অমগী সক্তম্ লাংগনী। মমী কুম্হৈসীংদা মহাক্কী সক্তম্ অসীনা মহাক্পু লুহোংলবা নুপী অমগী সক্তম্ লাংবা উবদা নুংঙাইবা ফাওৱী হাইবা উৎলী। মহাক্না অকক্নবা থৌদাং অসী লৌদুনা তোঙান্-তোঙান্বা কয়াগী থমোই সোক্হনগনী হাইনা থাজবা থম্লী। মহাক্না মাই পাক্কদ্রা নৎত্রগা তৌরোইদ্রা হাইবদু মহাক্না লেপ্থোক্তে। নহা ওইরবসু মহাক্ লুহোংলবনা মহাক্কী অপাম্বগী মতুং ইন্না মকোক্ থোংবা সক্তম্ অমা লৌনবা খনখীদে। অদুম্ ওইনমক্ মহাক্না লম্জীং-লম্তাক্পা অদুনা মঙোন্দা পীখীবা থৌদাং খুদীংমক্ লৌৱী। মমী কুম্হৈসীং অসী বোক্্সা ওফীসতা য়ৌনবা মহাক্না ওইথোক্পা য়াবা মওং খুদীংমক্তা সক্তম্ লাংবা নৎত্রগা থবক্ তৌবা পাম্মী। মমী কুম্হৈ অমদা সক্তম্ লাংবগী মহাক্কী অপাম্বা অদু মপুং ফারবসু মহাক্না মদুদা পেনখীদে। মহাক্কী মথংগী পান্দম্দী মহাক্কী চহী তরুক্ সুরবা মচানুপা রীসীবু মহাক্কী লাক্কদৌরীবা নুমীৎসীংদা মীয়াম্না পাম্নবা মমীরোই অমা ওইহন্বনী। অসুম্না, স্বীতীনা মাইপাক্লবা মমীরোই অমা ওইবগী অপাম্বা অদু মহাক্কী মচানুপাগী খুৎথাংদা মপুং ফাহন্বা ঙম্খী। মহাক্সু মসী মহাক্কী লম্বীদা লাক্কনী হাইনা থাজৈ। অমসুং মসীনা মরম্ ওইদুনা, স্বীতী অসী মতম্ পুম্নমক্তা থুম্বা অমসুং নোক্নীংবা ওইনা উবগী মরম্ অসীনী।[꯱]