ꯁꯣꯔꯤ ꯋꯥꯍꯦꯡꯕꯝ
ꯁꯣꯔꯤ ꯋꯥꯍꯦꯡꯕꯝ (ꯋꯥꯍꯦꯡꯕꯝ ꯔꯥꯁꯦꯁ꯭ꯋꯔꯤ) ꯑꯁꯤ ꯃꯤꯇꯩꯂꯣꯟꯒꯤ ꯃꯃꯤ ꯀꯨꯝꯍꯩ ꯁꯛꯇꯝ ꯂꯥꯡꯕꯤ ꯁꯤꯟꯂꯣꯏ ꯑꯃꯅꯤ ꯫[꯱]
ꯄꯨꯟꯁꯤ ꯋꯥꯔꯤ[ꯁꯦꯝꯒꯠꯂꯨ | ꯁꯦꯝꯒꯠꯂꯛꯄꯒꯤ ꯍꯧꯔꯛꯐꯝ]
ꯔꯥꯁꯦꯁ꯭ꯋꯔꯤ ꯑꯁꯤ ꯀꯂꯥꯕꯨ ꯊꯋꯥꯏ ꯌꯥꯎꯕ ꯃꯤꯑꯣꯏ ꯑꯃꯅꯤ꯫ ꯃꯍꯥꯛꯀꯤ ꯀꯣꯔꯤꯌꯣꯒ꯭ꯔꯥꯐꯤꯒꯤ ꯊꯕꯛꯁꯤꯡꯒꯤ ꯃꯊꯛꯇ, ꯃꯍꯥꯛ ꯊꯤꯌꯦꯇꯔ, ꯗ꯭ꯔꯃꯥ, ꯁꯨꯃꯥꯡ ꯂꯤꯂꯥ, ꯃ꯭ꯌꯨꯖꯤꯛ ꯚꯤꯗꯤꯑꯣꯁꯤꯡꯒꯤ ꯂꯝꯗꯁꯨ ꯃꯃꯤꯔꯣꯏ ꯑꯃꯅꯤ꯫ ꯃꯍꯥꯛꯅ ꯑꯉꯥꯡ ꯑꯣꯏꯔꯤꯉꯩꯒꯤ ꯃꯇꯝꯗ ꯂꯥꯡꯕ ꯑꯃꯁꯨꯡ ꯀꯟꯅ ꯊꯝꯕ ꯋꯥꯈꯜꯂꯣꯟ ꯑꯃ ꯂꯩꯔꯝꯃꯤ, ꯑꯗꯨꯕꯨ ꯃꯍꯥꯛꯅ ꯏꯟꯈꯠꯂꯛꯂꯤꯉꯩ ꯃꯇꯝꯗ ꯃꯍꯥꯛꯅ ꯖꯒꯣꯏ, ꯁꯛꯇꯝ ꯂꯥꯡꯕ ꯄꯥꯝꯃꯤ꯫ ꯃꯍꯥꯛꯀꯤ ꯂꯥꯡꯕ ꯑꯗꯨꯅ ꯃꯔꯝ ꯑꯣꯏꯗꯨꯅ ꯃꯍꯥꯛꯅ ꯃꯍꯥꯛꯀꯤ ꯃꯃꯥ-ꯃꯄꯥꯗ ꯐꯣꯡꯗꯣꯛꯄ ꯉꯝꯗꯦ꯫ ꯃꯍꯥꯛꯄꯨ ꯀꯂꯥꯒꯤ ꯂꯝꯗ ꯄꯨꯅꯕ ꯃꯍꯥꯛꯀꯤ ꯃꯔꯤ-ꯃꯇꯥ ꯑꯃꯠꯇ ꯂꯩꯇꯦ꯫ ꯃꯍꯥꯛꯀꯤ ꯃꯃꯥ-ꯃꯄꯥꯅ ꯃꯍꯥꯛꯄꯨ ꯁꯥꯟꯅ-ꯈꯣꯠꯅꯕꯒꯤ ꯃꯤꯑꯣꯏ ꯑꯃ ꯑꯣꯏꯍꯟꯕ ꯑꯃꯁꯨꯡ ꯃꯍꯥꯛꯄꯨ ꯖꯨꯗꯣ ꯁꯥꯟꯅꯍꯟꯕ ꯄꯥꯝꯃꯤ꯫ ꯃꯍꯥꯛꯅ ꯁꯥꯟꯅ-ꯈꯣꯠꯅꯕꯁꯤꯡ ꯄꯥꯝꯗꯕꯅ ꯃꯔꯝ ꯑꯣꯏꯗꯨꯅ ꯃꯍꯥꯛꯅ ꯃꯇꯝ ꯁꯥꯡꯅ ꯁꯥꯟꯅꯈꯤꯗꯦ꯫ ꯁꯣꯔꯤꯅ ꯀꯔꯤ ꯄꯥꯝꯃꯤ ꯍꯥꯏꯕꯗꯨ ꯈꯪꯕ ꯃꯍꯥꯛꯀꯤ ꯃꯆꯦ ꯑꯍꯜꯅ ꯃꯍꯥꯛꯄꯨ ꯀꯣꯔ꯭ꯁ ꯑꯃꯒꯤꯗꯃꯛ ꯐꯤꯜ꯭ꯃ ꯑꯦꯀꯥꯗꯦꯃꯤ ꯃꯅꯤꯄꯨꯔꯗ ꯄꯨꯈꯤ꯫ ꯃꯗꯨꯒꯤ ꯃꯇꯨꯡꯗ ꯃꯍꯥꯛꯅ ꯊꯤꯌꯦꯇꯔ ꯋꯥꯔꯛꯁꯣꯞꯁꯤꯡꯗ ꯁꯔꯨꯛ ꯌꯥꯈꯤ ꯃꯗꯨꯅ ꯃꯍꯥꯛꯅ ꯀꯔꯤꯒꯨꯝꯕ ꯃꯑꯣꯡꯗ ꯃꯍꯥꯛꯀꯤ ꯑꯄꯥꯝꯕ ꯀꯂꯥꯒꯤ ꯂꯝꯗ ꯆꯠꯄ ꯍꯧꯕ ꯉꯝꯈꯤ꯫ ꯁꯣꯔꯤꯅ ꯃꯃꯤ ꯀꯨꯝꯍꯩ ꯅꯝꯕꯗ ꯃꯍꯥꯛꯀꯤ ꯃꯔꯨꯞꯁꯤꯡꯕꯨ ꯃꯗꯨꯒꯤ ꯃꯇꯥꯡꯗ ꯂꯧꯁꯤꯡ ꯈꯔ ꯐꯪꯅꯕ ꯇꯨꯡ ꯏꯟꯗꯨꯅ ꯆꯠꯂꯝꯃꯤ꯫ ꯃꯍꯥꯛꯀꯤ ꯃꯆꯦ ꯑꯍꯜ ꯑꯃꯁꯨꯡ ꯃꯌꯥꯝꯕ ꯑꯍꯜꯒꯤ ꯃꯇꯦꯡꯒ ꯂꯣꯏꯅꯅ ꯃꯍꯥꯛꯅ ꯑꯍꯥꯟꯕ ꯑꯣꯏꯅ ꯏꯁꯩ-ꯅꯣꯡꯃꯥꯏꯒꯤ ꯚꯤꯗꯤꯑꯣ 'ꯅꯨꯡꯁꯤꯕꯤ ꯅꯥꯡꯇꯥꯅꯤ'ꯗ ꯁꯛꯇꯝ ꯂꯥꯡꯈꯤ꯫ ꯅꯤꯂꯥꯙ꯭ꯋꯥꯖꯥ ꯈꯨꯃꯟꯒꯤ ꯂꯝꯖꯤꯡ ꯂꯝꯇꯥꯛꯄꯒꯤ ꯃꯈꯥꯗ ꯁꯣꯔꯤꯒꯤ ꯑꯍꯥꯟꯕ ꯃꯃꯤꯀꯨꯃꯩ ꯑꯁꯤ 'ꯑꯁꯤꯊꯦꯜ'ꯅꯤ, ꯑꯗꯨꯕꯨ ꯂꯥꯏꯕꯛ ꯊꯤꯕꯗꯤ ꯃꯃꯤ ꯀꯨꯝꯍꯩ ꯑꯗꯨ ꯀꯩꯗꯧꯅꯨꯡꯗ ꯐꯣꯡꯈꯤꯗꯦ꯫ ꯃꯗꯨꯒꯤ ꯃꯇꯨꯡꯗ ꯁꯣꯔꯤꯅ ꯖꯦꯁꯃꯤꯟꯒꯤ ꯃꯇꯦꯡꯅ ꯑꯇꯦꯟꯕ ꯃꯃꯤ ꯀꯨꯝꯍꯩ ꯅꯣꯡꯊꯥꯡ ꯂꯦꯏꯃꯥꯗ ꯁꯛꯇꯝ ꯂꯥꯡꯈꯤ꯫ ꯃꯍꯥꯛꯅ ꯕꯤꯁ꯭ꯋꯃꯤꯇ꯭ꯔꯅ ꯂꯝꯖꯤꯡ-ꯂꯝꯇꯥꯛꯈꯤꯕ ꯑꯇꯦꯟꯕ ꯃꯃꯤ ꯀꯨꯝꯍꯩ ꯈꯨꯖꯤꯟꯗꯥ ꯒꯣꯄꯤꯗꯁꯨ ꯁꯄꯣꯔꯇꯤꯡ ꯑꯦꯛꯇꯔ ꯑꯃꯥ ꯑꯣꯏꯅ ꯁꯛꯇꯝ ꯂꯥꯡꯈꯤ꯫ ꯕ꯭ꯔꯍꯃꯆꯔꯤꯃꯌꯨꯝ ꯔꯣꯖꯤꯒꯤ ꯃꯇꯦꯡꯅ ꯃꯍꯥꯛꯅ ꯂꯥꯏꯃꯌꯨꯝ ꯁꯨꯔꯖꯥꯀꯥꯟꯇꯅ ꯂꯝꯖꯤꯡ-ꯂꯝꯇꯥꯛꯈꯤꯕ 'ꯃꯥꯏꯋꯣꯟ'ꯗ ꯁꯄꯣꯔꯇꯤꯡ ꯔꯣꯜ ꯑꯃꯥ ꯂꯧꯈꯤ꯫ ꯃꯥꯏ-ꯑꯣꯟ ꯑꯁꯤ ꯐꯤꯆꯔ ꯐꯤꯜ꯭ꯃ ꯑꯃꯗ ꯃꯍꯥꯛꯀꯤ ꯑꯍꯥꯟꯕ ꯑꯦꯛꯇꯤꯡꯅꯤ꯫[꯱]
ꯁꯣꯔꯤ ꯋꯥꯍꯦꯡꯕꯝꯒꯤ ꯊꯤꯌꯦꯇꯔꯒꯤ ꯃꯥꯏꯀꯩꯗ ꯑꯍꯥꯟꯕ ꯈꯣꯡꯊꯥꯡ ꯑꯗꯨ ꯏꯝꯐꯥꯜ ꯊꯤꯌꯦꯇꯔꯗ ꯑꯣꯏꯈꯤ꯫ ꯊꯤꯌꯦꯇꯔ ꯄ꯭ꯂꯦꯗ ꯃꯍꯥꯛꯀꯤ ꯑꯍꯥꯟꯕ ꯁꯛꯇꯝ ꯑꯁꯤ ꯂꯣꯏꯇꯣꯡꯕꯝ ꯗꯣꯔꯦꯟꯒꯤ ꯂꯝꯖꯤꯡ ꯃꯈꯥꯗ ꯏꯝꯐꯥꯜ ꯊꯤꯌꯦꯇꯔꯒꯤ ꯇꯥꯖꯃꯍꯜꯗ ꯁꯅꯥꯔꯦꯏꯒꯤ ꯁꯛꯇꯝ ꯂꯥꯡꯈꯤ꯫ ꯑꯗꯨꯗꯒꯤ ꯃꯊꯪꯗ ꯑꯄꯨꯟꯕꯥ ꯁꯛꯇꯝ ꯑꯥꯔꯇꯤꯁ꯭ꯠ ꯑꯦꯁꯣꯁꯤꯑꯦꯁꯟꯒꯤ ꯑꯁꯤꯕꯥꯒꯤ ꯋꯥꯀꯠꯀꯤ ꯑꯦꯁ.ꯀꯦ. ꯃꯪꯒꯥꯡꯒꯤ ꯂꯝꯖꯤꯡ-ꯂꯝꯇꯥꯛꯄꯒꯤ ꯃꯈꯥꯗ ꯃꯔꯨꯑꯣꯏꯕ ꯁꯛꯇꯝ ꯂꯥꯡꯈꯤ꯫ ꯃꯍꯥꯛꯅ ꯑꯦꯁ ꯊꯥꯅꯤꯟꯂꯦꯃꯥꯒꯤ ꯂꯝꯖꯤꯡ-ꯂꯝꯇꯥꯛꯄꯒꯤ ꯃꯈꯥꯗ ꯈꯦꯟꯖꯣꯡꯂꯥꯡ ꯊꯤꯌꯦꯇꯔꯒꯤ 'ꯔꯤꯛꯁꯥ ꯑꯃꯥꯁꯨꯡ ꯅꯣꯡꯃꯦꯏ" ꯑꯃꯁꯨꯡ "ꯃꯦꯇ꯭ꯔꯤꯛ ꯄꯥꯁ"ꯒꯤꯗꯃꯛꯇꯁꯨ ꯁꯛꯇꯝ ꯂꯥꯡꯈꯤ꯫ ꯃꯃꯤꯡ ꯂꯩꯔꯕ ꯊꯤꯌꯦꯇꯔꯒꯤ ꯂꯝꯖꯤꯡ-ꯂꯝꯇꯥꯛꯄꯁꯤꯡ ꯑꯁꯤꯒꯤ ꯃꯈꯥꯗ ꯊꯕꯛ ꯇꯧꯗꯨꯅ ꯃꯍꯥꯛꯅ ꯂꯧꯁꯤꯡ ꯀꯌꯥ ꯐꯪꯕ ꯉꯝꯈꯤ꯫ ꯃꯃꯤ ꯀꯨꯝꯍꯩꯁꯤꯡꯗ, ꯁꯣꯔꯤ ꯋꯥꯍꯦꯡꯕꯝꯅ ꯃꯥꯏ-ꯑꯣꯟ, ꯏꯌꯥ ꯌꯥꯏ, ꯅꯤꯡꯊꯣꯎ, ꯄꯥꯂꯦꯝ ꯏꯃꯥ, ꯐꯣꯔ ꯏꯟ ꯋꯥꯟ, ꯄꯤꯌꯥꯏꯅꯨ ꯑꯃꯁꯨꯡ ꯑꯇꯩꯁꯤꯡꯗ ꯁꯛꯇꯝ ꯂꯥꯡꯈ꯭ꯔꯦ꯫ ꯃꯍꯥꯛꯀꯤ ꯑꯇꯣꯞꯄ ꯊꯕꯛꯁꯤꯡꯒꯤ ꯃꯅꯨꯡꯗ ꯊꯤꯌꯦꯇꯔ, ꯁꯨꯃꯥꯡ ꯂꯤꯂꯥ, ꯃ꯭ꯌꯨꯖꯤꯛ ꯚꯤꯗꯤꯑꯣꯁꯤꯡ, ꯃꯃꯤ ꯀꯨꯝꯍꯩꯁꯤꯡ ꯑꯁꯤꯅꯆꯤꯡꯕꯗ ꯁꯛꯇꯝ ꯂꯥꯡꯕꯒꯤ ꯃꯊꯛꯇ ꯀꯣꯔꯤꯑꯣꯒ꯭ꯔꯥꯐꯤ ꯇꯧꯕ ꯌꯥꯎꯔꯤ꯫ ꯃꯍꯥꯛꯀꯤ ꯀꯣꯔꯤꯌꯣꯒ꯭ꯔꯥꯐꯤꯒꯤ ꯂꯧꯁꯤꯡ ꯑꯁꯤ ꯃꯍꯥꯛꯅ ꯐꯤꯜ꯭ꯃ ꯑꯦꯀꯥꯗꯦꯃꯤ ꯃꯅꯤꯄꯨꯔ ꯑꯃꯁꯨꯡ ꯑꯦ.ꯑꯥꯔ.ꯗꯤ.ꯑꯦ.ꯁꯤ. ꯒ꯭ꯔꯨꯞꯀ ꯃꯔꯤ ꯂꯩꯅꯕꯗꯒꯤ ꯑꯣꯏꯈꯤ꯫ ꯃꯇꯨꯡꯗ ꯁꯣꯔꯤ ꯋꯥꯍꯦꯡꯕꯝꯅ ꯕꯆꯟ ꯆꯣꯡꯊꯥꯝꯗꯒꯤ ꯁꯨꯒꯦꯁꯁꯟꯁꯤꯡ ꯐꯪꯈꯤ꯫ ꯏꯁꯩ-ꯅꯣꯡꯃꯥꯏꯒꯤ ꯚꯤꯗꯤꯑꯣꯁꯤꯡꯗ ꯃꯍꯥꯛꯀꯤ ꯀꯣꯔꯤꯌꯣꯒ꯭ꯔꯥꯐꯤꯒꯤ ꯊꯕꯛꯁꯤꯡ ꯑꯁꯤ ꯍꯥꯏꯅꯦ ꯂꯝꯂꯣꯏ, ꯈꯣꯏꯗꯥꯔꯨꯔꯦ, ꯅꯨꯡꯁꯤ ꯃꯆꯨꯅꯤ, ꯅꯨꯡꯁꯤꯒꯤ ꯋꯥꯍꯦꯏꯅꯥ, ꯌꯥꯑꯣꯁꯥꯡ ꯌꯥꯑꯣꯁꯥꯡꯗ ꯎꯕ ꯐꯪꯒꯅꯤ꯫ ꯃꯍꯥꯛꯅ ꯂꯦꯞꯄꯤꯔꯥꯕꯥ ꯅꯥꯡꯅꯥ, ꯅꯪꯅꯥ ꯊꯥꯖꯥꯅꯤ, ꯀꯣꯔꯧꯅꯥ ꯊꯣꯛꯂꯛꯄꯗꯥ ꯑꯁꯤꯅꯆꯤꯡꯕꯒꯤꯗꯃꯛ ꯀꯣꯔꯤꯑꯣꯒ꯭ꯔꯥꯐꯤꯁꯨ ꯇꯧꯈ꯭ꯔꯦ꯫ ꯃꯍꯥꯛꯅ ꯀꯦꯔꯂꯥꯒꯤ ꯒꯨꯋꯥꯍꯥꯇꯤꯗ ꯄꯥꯡꯊꯣꯛꯈꯤꯕ ꯊꯤꯌꯦꯇꯔ ꯐꯦꯁꯇꯤꯕꯦꯜ, ꯏꯟꯇꯔꯅꯦꯁꯅꯦꯜ ꯌꯨꯊ ꯐꯦꯁꯇꯤꯕꯦꯜꯗ ꯁꯔꯨꯛ ꯌꯥꯈ꯭ꯔꯦ꯫ ꯃꯃꯤ ꯀꯨꯝꯍꯩꯁꯤꯡꯒꯤ ꯅꯝꯕ ꯑꯁꯤ ꯁꯤꯜꯂꯣꯡ, ꯁꯤꯜꯆꯔ, ꯒꯨꯋꯥꯍꯥꯇꯤ, ꯇꯥꯃꯨ (ꯃ꯭ꯌꯥꯟꯃꯥꯔ)ꯗꯁꯨ ꯄꯥꯡꯊꯣꯛꯈꯤ꯫ ꯁꯣꯔꯤ ꯋꯥꯍꯦꯡꯕꯝꯅ ꯀꯂꯥꯒꯤ ꯂꯝꯗ ꯃꯍꯥꯛꯀꯤ ꯈꯣꯡꯆꯠ ꯑꯗꯨꯒꯤ ꯊꯥꯒꯠꯄ ꯐꯣꯡꯗꯣꯛꯂꯤ ꯃꯗꯨꯗꯤ ꯃꯍꯥꯛꯀꯤ ꯃꯆꯦ ꯑꯍꯜ ꯑꯃꯁꯨꯡ ꯑꯅꯤꯁꯨꯕ ꯃꯌꯥꯝꯕ ꯑꯍꯜ, ꯃꯍꯥꯛꯀꯤ ꯏꯃꯨꯡ ꯃꯅꯨꯡꯒꯤ ꯃꯤꯑꯣꯏꯁꯤꯡ, ꯃꯍꯥꯛꯀꯤ ꯒꯨꯔꯨꯁꯤꯡ, ꯃꯍꯥꯛꯀꯤ ꯂꯝꯖꯤꯡ-ꯂꯝꯇꯥꯛꯄꯁꯤꯡ ꯑꯃꯁꯨꯡ ꯃꯍꯥꯛꯀꯤ ꯌꯥꯏꯐꯕ ꯄꯥꯝꯖꯕꯁꯤꯡꯅꯤ꯫ ꯃꯍꯥꯛꯀꯤ ꯈꯣꯡꯆꯠ ꯑꯁꯤ ꯑꯔꯥꯏꯕ ꯑꯣꯏꯈꯤꯗꯦ꯫ ꯏꯃꯨꯡ ꯃꯅꯨꯡꯒꯤ ꯃꯤꯑꯣꯏꯁꯤꯡꯅ ꯃꯍꯥꯛꯄꯨ ꯄꯨꯛꯅꯤꯡ ꯊꯧꯒꯠꯈꯤꯗ꯭ꯔꯕꯁꯨ ꯃꯍꯥꯛꯄꯨ ꯂꯝꯖꯤꯡꯅꯕ ꯀꯅꯥꯒꯨꯝꯕ ꯑꯃꯠꯇ ꯂꯩꯈꯤꯗꯦ꯫ ꯃꯍꯥꯛꯀꯤ ꯃꯆꯦ ꯑꯍꯜꯅ ꯃꯍꯥꯛꯀꯤ ꯑꯍꯥꯟꯕ ꯈꯣꯡꯆꯠꯇ ꯃꯍꯥꯛꯀꯤ ꯑꯃꯠꯇ ꯉꯥꯏꯔꯕ ꯂꯝꯖꯤꯡ-ꯂꯝꯇꯥꯛꯄ ꯑꯣꯏꯈꯤ, ꯑꯗꯨꯕꯨ ꯍꯧꯖꯤꯛꯇꯤ ꯏꯃꯨꯡ ꯃꯅꯨꯡꯒꯤ ꯃꯤꯑꯣꯏ ꯄꯨꯝꯅꯃꯛꯅ ꯃꯍꯥꯛꯄꯨ ꯁꯧꯒꯠꯂꯤ꯫ ꯃꯈꯣꯏꯒꯤ ꯃꯇꯦꯡ ꯄꯨꯝꯅꯃꯛꯀ ꯂꯣꯏꯅꯅ ꯃꯍꯥꯛꯅ ꯀꯂꯥꯒ ꯃꯇꯝ ꯆꯨꯞꯄꯒꯤ ꯑꯣꯏꯅ ꯃꯔꯤ ꯂꯩꯅꯕ ꯄꯥꯝꯃꯤ꯫ ꯑꯗꯨꯕꯨ ꯄꯨꯝꯅꯃꯛ ꯃꯍꯥꯛꯀꯤ ꯂꯥꯏꯕꯛꯀꯤ ꯃꯈꯥ ꯄꯣꯜꯂꯤ꯫[꯱] ꯀꯂꯥꯒ ꯃꯍꯥꯛꯀꯤ ꯃꯔꯤ ꯑꯁꯤ ꯏꯪ ꯲꯰꯱꯱ꯗꯒꯤ ꯍꯧꯈꯤ꯫ ꯍꯧꯖꯤꯛ ꯐꯥꯎꯕꯗ ꯃꯍꯥꯛꯅ ꯃꯃꯤ ꯀꯨꯝꯍꯩꯁꯤꯡꯒꯤ ꯃꯅꯨꯡꯗ ꯃꯃꯤ ꯀꯨꯝꯍꯩ 'ꯄꯥꯂꯦꯝ ꯏꯃꯥ'ꯒꯤ ꯁꯛꯇꯝ ꯑꯗꯨ ꯄꯥꯝꯃꯤ꯫ ꯊꯤꯌꯦꯇꯔꯗ, ꯃꯍꯥꯛꯀꯤ ꯃꯃꯤꯔꯣꯏ ꯂꯥꯂꯨꯅꯁꯨ ꯌꯥꯝꯅ ꯃꯇꯦꯡ ꯄꯥꯡꯈꯤꯕ ꯃꯦꯇ꯭ꯔꯤꯛ ꯄꯥꯁ ꯐꯝꯕꯥꯛ ꯀꯨꯝꯍꯩ ꯑꯗꯨꯒꯤꯗꯃꯛ ꯃꯍꯥꯛꯀꯤ ꯁꯛꯇꯝ ꯂꯥꯡꯕꯗ ꯃꯍꯥꯛꯅ ꯄꯦꯟꯈꯤ꯫ ꯐꯝꯕꯥꯛ ꯀꯨꯝꯍꯩ ꯑꯗꯨꯒꯤ ꯃꯤꯌꯥꯝꯅꯁꯨ ꯐꯝꯕꯥꯛ ꯀꯨꯝꯍꯩ ꯑꯁꯤꯗ ꯃꯍꯥꯛꯀꯤ ꯊꯧꯗꯥꯡ ꯑꯗꯨꯒꯤꯗꯃꯛ ꯃꯇꯝ ꯄꯨꯝꯅꯃꯛꯇ ꯊꯥꯒꯠꯈꯤ꯫ ꯁꯤꯟꯅꯥꯏꯕꯁꯤꯡꯒꯤꯗꯃꯛ, ꯃꯤꯌꯥꯝꯗꯒꯤ ꯊꯥꯒꯠꯄ ꯑꯁꯤꯅ ꯌꯥꯝꯅ ꯇꯥꯛꯏ꯫[꯱]
ꯁꯣꯔꯤ ꯋꯥꯍꯦꯡꯕꯝꯅ ꯀꯂꯥ ꯄꯥꯝꯗꯕ ꯃꯤꯑꯣꯏꯁꯤꯡꯒ ꯃꯔꯨꯞ ꯑꯣꯏꯗꯦ ꯫ ꯃꯍꯥꯛ ꯗ꯭ꯔꯒ ꯁꯤꯖꯤꯟꯅꯕ ꯃꯤꯑꯣꯏꯁꯤꯡꯕꯨ ꯅꯨꯡꯁꯤꯗꯦ ꯫ ꯃꯍꯥꯛ ꯃꯇꯝ ꯄꯨꯝꯅꯃꯛꯇ ꯃꯃꯤ ꯀꯨꯝꯍꯩꯁꯤꯡꯗ ꯁꯛꯇꯝ ꯂꯥꯡꯕ ꯄꯥꯝꯃꯤ꯫ ꯃꯍꯥꯛꯅ ꯃꯤꯄꯨꯝ ꯈꯨꯗꯤꯡꯃꯛꯄꯨ ꯁꯤꯟꯅꯥꯏꯕꯁꯤꯡꯕꯨ ꯏꯀꯥꯏ ꯈꯨꯝꯅꯕ ꯎꯠꯅꯕ ꯍꯥꯏꯖ ꯃꯤꯄꯨꯝ ꯈꯨꯗꯤꯡꯃꯛꯅ ꯁꯤꯟꯅꯥꯏꯕ ꯑꯗꯨꯕꯨ ꯏꯀꯥꯏ ꯈꯨꯝꯅꯕ ꯎꯠꯀꯗꯕꯅꯤ ꯑꯃꯁꯨꯡ ꯃꯇꯦꯡ ꯄꯥꯡꯒꯗꯕꯅꯤ ꯃꯗꯨꯅ ꯑꯩꯈꯣꯏꯅ ꯁꯥꯟꯇꯤ ꯑꯃꯁꯨꯡ ꯌꯥꯏꯐꯕ ꯃꯑꯣꯡꯗ ꯍꯤꯡꯒꯗꯕꯅꯤ ꯫ ꯁꯣꯁꯤꯌꯦꯜ ꯃꯤꯗꯤꯌꯥ ꯑꯁꯤ ꯑꯐꯕ ꯄꯥꯝꯕꯩ ꯑꯃꯅꯤ ꯃꯔꯝꯗꯤ ꯃꯁꯤꯅ ꯀꯅꯥꯒꯨꯝꯕ ꯑꯃꯒꯤ ꯍꯩꯊꯣꯏ-ꯁꯤꯡꯊꯣꯏꯕ ꯑꯗꯨ ꯐꯣꯡꯗꯣꯛꯄ ꯉꯝꯃꯤ ꯍꯥꯏꯅ ꯃꯍꯥꯛꯅ ꯋꯥꯈꯜꯂꯣꯟ ꯊꯝꯈꯤ꯫ ꯃꯁꯤꯅ ꯃꯤꯑꯣꯏ ꯀꯌꯥꯒꯤ ꯑꯋꯥꯕ ꯄꯨꯟꯁꯤ ꯑꯗꯨ ꯎꯠꯂꯤ ꯑꯃꯁꯨꯡ ꯃꯊꯪ ꯃꯊꯪ ꯃꯈꯣꯏꯒꯤ ꯑꯋꯥꯕ ꯃꯇꯝꯗ ꯑꯃꯒ-ꯑꯃꯒ ꯃꯇꯦꯡ ꯄꯥꯡꯕ ꯉꯝꯒꯅꯤ꯫ ꯃꯁꯤ ꯑꯩꯈꯣꯏꯒꯤ ꯋꯥꯈꯜꯂꯣꯟꯁꯤꯡ ꯌꯦꯟꯊꯣꯛꯅꯕ ꯌꯥꯕ ꯄꯥꯝꯕꯩ ꯑꯃꯁꯨ ꯑꯣꯏꯔꯤ꯫ ꯃꯁꯤ ꯑꯩꯈꯣꯏꯅ ꯑꯅꯧꯕ ꯑꯃꯁꯨꯡ ꯑꯐꯕ ꯄꯣꯠꯂꯝ ꯀꯌꯥ ꯇꯝꯕ ꯌꯥꯕ ꯂꯧꯁꯤꯡꯒꯤ ꯕꯦꯡꯛ ꯑꯃꯅꯤ꯫ ꯀꯔꯤꯒꯨꯝꯕ ꯃꯇꯝꯗ ꯃꯁꯤꯅ ꯐꯠꯇꯕ ꯃꯁꯛ ꯑꯃꯁꯨ ꯄꯤ꯫ ꯁꯣꯁꯤꯌꯦꯜ ꯃꯤꯗꯤꯌꯥꯒꯤ ꯈꯨꯠꯊꯥꯡꯗ ꯋꯥꯐꯝ ꯁꯟꯗꯣꯛꯂꯤ꯫ ꯑꯗꯨꯅ, ꯀꯅꯥꯒꯨꯝꯕ ꯑꯃꯅ ꯁꯣꯁꯤꯌꯦꯜ ꯃꯤꯗꯤꯌꯥ ꯑꯁꯤ ꯌꯥꯝꯅ ꯆꯦꯛꯁꯤꯟꯅ ꯁꯤꯖꯤꯟꯅꯒꯗꯕꯅꯤ ꯫[꯱]