ꯏꯆꯥ ꯉꯥꯎꯔꯦ

ꯏꯇꯩꯃ ꯏꯕꯦꯊꯣꯏꯒꯤ ꯃꯆꯥꯅꯨꯄꯤ ꯉꯥꯛꯇ ꯑꯅꯤꯅꯤ꯫ ꯂꯩꯁꯥꯕꯤ ꯃꯆꯥ ꯀꯥꯕꯛ ꯀꯥꯕꯛ ꯐꯥꯔꯕꯅꯤ꯫ ꯑꯃꯅ ꯀꯣꯂꯦꯖ ꯀꯥꯔꯤ꫰ ꯑꯃꯅ ꯇꯨꯌꯦꯜꯐ ꯊꯥꯗꯧ ꯇꯧꯔꯤ꯫ ꯏꯇꯩꯃ ꯏꯕꯦꯊꯣꯏ ꯑꯣꯐꯤꯁ ꯑꯃꯗ ꯊꯕꯛ ꯇꯧꯏ꫰ ꯃꯇꯝꯁꯤꯒꯤ ꯃꯤꯅꯤ꫰ ꯍꯥꯏ-ꯐꯥꯏ ꯃꯧꯅꯤ꯫ ꯑꯣꯐꯤꯁꯀ ꯀꯥꯕꯁꯤꯗꯤ ꯃꯆꯨꯝ ꯇꯥꯈꯩ ꯀꯦꯊꯔꯒ ꯀꯥꯕꯤꯅꯤ꯫ ꯏꯇꯩꯃꯒ ꯂꯦꯡꯊꯩꯅꯕꯁꯤꯗꯤ꫰ ꯀꯔꯤ ꯃꯅꯝꯅꯣ ꯈꯪꯗꯦ ꯍꯨꯡ ꯍꯨꯡ ꯂꯥꯎꯕꯤꯅꯤ ꯅꯨꯡꯁꯤꯈ꯭ꯔꯕ꫰ ꯃꯃꯜꯗꯤ ꯈꯔ ꯇꯥꯡꯂꯝꯒꯅꯤ ꯃꯥꯅ ꯆꯥꯏꯔꯤꯕ ꯃꯅꯝ ꯆꯦꯟꯕ ꯊꯥꯎꯗꯨ꯫ ꯃꯤ ꯄꯨꯝꯅꯃꯛꯅ ꯂꯦꯡꯊꯩꯅꯕꯗ꫰ ꯇꯨꯡ ꯍꯜꯂ ꯍꯜꯂꯒ ꯌꯦꯡꯅꯕꯤꯅꯤ꯫ ꯃꯗꯨ ꯈꯪꯕꯗ ꯏꯇꯩꯃꯅ ꯍꯔꯥꯎꯖꯔꯗꯅ ꯅꯣꯛꯐꯦꯠ ꯇꯧꯖꯔꯤꯕꯅꯤ꫰ ꯃꯆꯥ ꯂꯩꯁꯥꯕꯤ ꯐꯥꯔꯐꯥꯎ꯫ ꯇꯥꯃꯣꯗꯨꯁꯨ ꯑꯌꯥꯕꯤꯅꯤ꯫ ꯊꯤꯀꯥꯗꯥꯔꯅꯤ꫰ ꯁꯦꯜ ꯅꯝꯊꯤꯈꯩ ꯄꯥꯏꯁꯤꯜꯂꯒ꫰ ꯑꯋꯥꯔꯥꯗ ꯂꯩꯊꯣꯛꯄꯅꯤ꯫ ꯆꯥꯅꯤꯡꯕ ꯆꯥ꫰ ꯊꯛꯅꯤꯡꯕ ꯊꯥꯛ꫰ ꯏꯍ! ꯅꯨꯡꯉꯥꯏꯈ꯭ꯔꯕ ꯄꯨꯟꯁꯤ ꯍꯥꯏꯗꯨꯅꯤ꯫ ꯇꯨꯌꯦꯜꯐ ꯊꯥꯗꯧꯕꯤꯕꯤꯗꯨꯗꯤ ꯇ꯭ꯌꯨꯁꯟ ꯆꯠꯂꯤ꯫ ꯃꯝꯂꯤꯉꯩꯗꯒꯤ ꯒꯥꯔꯤ ꯃꯆꯥ ꯑꯃ ꯊꯧꯗꯣꯛꯂꯒ ꯃꯊꯟꯇ ꯆꯠꯂꯤ꯫ ꯃꯃꯥ ꯃꯄꯥꯅ ꯍꯟꯅ ꯌ ꯦꯡꯁꯤꯟꯗꯦ꫰ ꯃꯆꯥ ꯇ꯭ꯌꯨꯁꯟ ꯆꯠꯂꯤꯅꯤ ꯍꯥꯏꯗꯨꯗꯅꯤ ꯈꯪꯏꯕ꫰ ꯀꯔꯤ ꯇꯧꯔꯕ ꯅꯣꯡꯃꯇ ꯊꯤꯔꯨꯗꯦ꯫ ꯃꯆꯥꯅ ꯂꯩꯌꯨ ꯍꯥꯏ ꯍꯥꯏꯗꯅ ꯐꯣꯟꯒꯁꯤ ꯑꯇꯥꯡꯕ ꯑꯥꯏ ꯐꯣꯟ ꯑꯃꯒ ꯄꯥꯏꯕꯤꯅꯤ꯫ ꯍꯜꯂꯛꯄꯒ ꯁ꯭ꯀꯨꯜ ꯆꯠꯄꯅꯦꯅ ꯆꯤꯂꯤ꯫ ꯅꯣꯡꯃꯇ ꯁꯣꯏꯗꯦ꫰ ꯁ꯭ꯀꯨꯜ ꯆꯠꯇꯕ꫰ ꯇ꯭ꯌꯨꯁꯟ ꯆꯠꯇꯕ ꯌꯥꯎꯗꯦ꯫ ꯃꯃꯥꯅꯗꯤ ꯃꯆꯥꯅ ꯊꯋꯥꯏ ꯌꯥꯎꯖꯕꯗꯨ ꯎꯕꯗ ꯄꯦꯟꯖꯩ꯫ ꯃꯆꯦꯁꯨ ꯑꯗꯨꯃꯉꯥꯏ꫰ ꯀꯣꯂꯦꯖ ꯆꯥꯡ ꯅꯥꯏꯅ ꯆꯠꯂꯤ꫰ ꯀ꯭ꯂꯥꯁ ꯌꯥꯎꯕ꯭ꯔ ꯌꯥꯎꯗꯕ꯭ꯔ ꯍꯥꯏꯕꯗꯤ ꯈꯪꯗꯦ꯫ ꯃꯄꯥꯅ ꯅꯨꯃꯤꯠ ꯇꯥꯕꯒ ꯄꯥꯔꯇꯤ꫰ ꯉꯧꯕꯤ꫰ ꯇꯥꯎꯕꯤ꫰ ꯊꯛꯄꯤ꯫ ꯃꯃꯥꯅ ꯃꯌꯥꯝꯗꯨꯒ ꯌꯥ-ꯌꯥ꫰ ꯒꯥ-ꯒꯥ꯫ ꯃꯆꯥꯁꯤꯡꯅ ꯁꯣꯝꯗ ꯃꯥꯏ ꯃꯥꯏ ꯀꯥꯗ ꯂꯥꯏꯔꯤꯛ ꯄꯥꯔꯤꯕ ꯐꯣꯟ ꯄꯥꯔꯤꯔ ꯈꯪꯗꯦ꫰ ꯅꯣꯛꯐꯦꯠ ꯅꯣꯛꯐꯦꯠ ꯇꯧꯗꯨꯅ ꯑꯃꯨꯛ ꯎꯞ꫰ ꯑꯃꯨꯛ ꯆꯦꯞ꫰ ꯑꯃꯨꯛ ꯂꯣꯡ ꯇꯧꯗꯨꯅ ꯂꯩꯔꯤ꯫ ꯃꯃꯥ ꯃꯄꯥ ꯆꯪꯂꯛꯄꯗꯅ ꯂꯥꯏꯔꯛ ꯑꯃ ꯐꯥꯛꯇꯣꯛꯂꯒ ꯌꯦꯡꯏ꯫ ꯃꯣꯏ ꯃꯇꯧꯗꯨ ꯎꯕꯗ ꯃꯃꯥ ꯃꯄꯥꯒꯤ ꯑꯥꯁꯥꯁꯤ ꯅꯣꯡꯃ ꯅꯣꯡꯃꯒꯤ ꯆꯥꯎꯈꯠꯂꯛꯏ꯫ ꯃꯆꯥꯁꯤꯡꯒꯤ ꯑꯄꯦꯟꯕ ꯅꯨꯡꯉꯥꯏꯖꯕꯗꯨ ꯎꯕꯗ ꯄꯦꯟꯖꯩ꯫ == ꯍꯟꯗꯛ ꯈꯪꯍꯧꯗꯅ ꯃꯣꯕꯥꯏꯜ ꯗꯦꯇꯥ ꯅꯨꯃꯤꯠ ꯃꯉꯥꯅꯤ ꯊꯤꯡꯕꯗꯨꯗ ꯃꯆꯥꯈꯩ ꯇꯧꯐꯝ ꯈꯪꯗꯗꯅ ꯃꯆꯤ ꯃꯆꯤꯗ ꯆꯞ ꯆꯞ ꯂꯦꯞꯇꯨꯅ ꯃꯃꯥꯏ ꯃꯃꯤꯠ ꯏꯃꯛ ꯃꯛꯅ ꯂꯩꯕꯗꯨ ꯎꯕꯗ ꯃꯃꯥꯅ ꯄꯥꯈꯠꯂꯤ꯫ ꯃꯆꯥ ꯅꯨꯄꯤ ꯑꯍꯜꯗꯨ ꯃꯊꯣꯜ ꯑꯍꯨꯝꯁꯨꯕꯒꯤ ꯕꯦꯜꯀꯣꯅꯤ ꯃꯥꯡꯒꯣꯜꯗ ꯂꯩꯔꯤꯕ ꯔꯦꯂꯤꯡꯗꯨꯗ ꯉꯥꯔꯒ ꯅꯨꯡꯁꯨꯛ ꯅꯨꯡꯖꯥꯅꯅ ꯂꯩꯔꯤꯕꯗꯨꯒꯤ ꯃꯅꯥꯛꯇ ꯆꯪꯁꯤꯜꯂꯒ ꯍꯪꯂꯨꯏ꫰ “ꯏꯕꯦꯝꯃ ꯀꯩꯗꯧꯔꯦ꫰ ꯅꯁꯥ ꯉꯝꯗꯕꯔ꫱ ꯂꯥꯏꯔꯤꯛꯀ ꯑꯃꯠꯇ ꯄꯥꯗ꯭ꯔꯗꯤ꫰ ꯏꯃꯥꯗ ꯍꯥꯏꯌꯨ꫱” ꯈꯨꯝꯃꯝꯗꯅ ꯃꯆꯥꯅꯨꯄꯤ ꯑꯍꯜꯗꯨ ꯃꯥꯒꯤ ꯀꯥꯗ ꯆꯪꯈ꯭ꯔꯒ ꯐꯃꯨꯡꯗ ꯕꯣꯝ ꯂꯥꯎꯅ ꯍꯤꯞꯆꯤꯟꯈꯤ꯫

“ꯀꯩꯅꯣꯅꯦ꫰ ꯀꯩꯗꯧꯔꯕꯅꯣꯅꯦ ꯇꯧꯔꯤꯁꯤꯕꯣ꫰ ꯁꯤꯕꯨ ꯂꯥꯏꯒꯥꯏꯗꯨ ꯑꯣꯛꯅꯔꯖꯥꯠꯂꯅꯦ”
ꯈꯜꯂꯤ ꯃꯆꯥꯒꯤ ꯃꯇꯧꯗꯨ ꯎꯕꯗ꫰ ꯍꯪꯏ ꯈꯨꯝꯗꯦ꫰ ꯆꯥꯛ ꯆꯥꯔꯦ꫰ ꯄꯦꯠ ꯄꯦꯠ ꯈꯔ ꯃꯦꯠꯂꯝꯃꯒ ꯑꯗꯨꯝ ꯃꯈꯨꯠ ꯍꯥꯝꯖꯤꯜꯂꯒ ꯊꯣꯛꯈꯤ꯫ ꯃꯆꯥꯅꯨꯄꯤ ꯑꯇꯣꯟꯕꯤꯗꯨꯁꯨ ꯑꯗꯨ ꯃꯉꯥꯏ꫰ ꯃꯥꯒꯤ ꯀꯥꯒꯤ ꯆꯧꯀ꯭ꯔꯤꯗꯨꯗ ꯇꯨꯃꯤꯟ ꯐꯝꯃꯒ ꯎꯪꯗꯨꯅ ꯂꯩꯔꯝꯃꯤ꯫ ꯆꯪꯁꯤꯟꯗꯨꯅꯕꯨ ꯍꯪꯂꯨꯏ꫰
“ꯏꯆꯥꯊꯣꯏ꫰ ꯀꯩꯗꯧꯔꯦ꫰ ꯅꯆꯦꯁꯨ ꯃꯁꯥ ꯉꯝꯗꯕ꯭ꯔ ꯀꯩꯅꯣ꫰ ꯍꯤꯞꯆꯤꯟꯗꯅ ꯂꯩꯍꯧꯏ꯫ ꯅꯪꯅ ꯀꯩꯗꯧꯔꯦ꫱”
“ꯏꯃꯥ! ꯋꯥ ꯌꯥꯝꯅ ꯉꯥꯡꯅꯨꯀꯣ꫰ ꯆꯠꯂꯣ ꯑꯥꯗ ꯑꯩ ꯈꯣꯏꯗꯧ ꯌꯥꯝ ꯁꯥꯎꯒꯠꯂꯤ”
ꯁꯨꯛꯇꯣꯛꯇꯨꯅ ꯑꯗꯨꯝ ꯐꯝꯃꯤ꯫ ꯃꯃꯥꯅꯗꯤ ꯈꯜꯂꯤ꫰ ꯃꯁꯤꯕꯨ ꯑꯣꯖꯥꯅ ꯆꯩꯔꯛꯂꯕꯔ꫰ ꯅꯠꯇ꯭ꯔꯒ ꯃꯃꯥꯟꯅꯕꯤꯁꯤꯡꯒ ꯃꯔꯩ ꯇꯧꯅꯗꯨꯅ ꯈꯠꯅꯕꯔ꫱ ꯀꯔꯤ ꯃꯅꯤꯡ ꯊꯨꯡꯗꯕ ꯂꯩꯔꯕꯅꯣ꫱
“ꯁꯦ ꯏꯆꯥꯒꯤ ꯅꯨꯉꯥꯏꯇꯕꯗꯣ ꯏꯃꯥꯗ ꯍꯥꯏꯌꯨ꫰ ꯀꯅꯥꯅ ꯏꯆꯥꯗ ꯂꯥꯛꯆꯩ꫰ ꯏꯃꯥ ꯂꯩꯔꯤꯁꯤꯗꯤ꫰ ꯀꯅꯥꯅꯣ ꯏꯆꯥꯕꯨ ꯅꯨꯡꯉꯥꯏꯍꯟꯗ꯭ꯔꯤꯁꯦ꫰ ꯃꯇꯤꯛ ꯊꯣꯛꯄ ꯂꯥꯛꯅꯒꯦ꫰ ꯍꯥꯏꯌꯨ ꯏꯃꯥꯗ꫱”
“ꯅꯨꯡꯉꯥꯏꯈꯤꯗ꯭ꯔꯦꯗ ꯏꯃꯥ! ꯈꯣꯏꯗꯧꯅ ꯈꯣꯏꯗꯧ ꯁꯥꯎꯒꯠꯄꯁꯤꯗ ꯄꯦꯠ-ꯄꯥ꫰ ꯄꯦꯠ-ꯄꯥ”
ꯐꯨꯛ ꯍꯧꯒꯠꯂꯒ ꯐꯃꯨꯡꯗ ꯃꯆꯦꯒꯨꯝ ꯍꯤꯞꯆꯤꯟꯈꯤ꯫ ꯏꯕꯦꯊꯣꯏ ꯀꯩꯅꯣ ꯇꯧꯔꯤꯁꯤꯕꯣ ꯍꯥꯏꯅ ꯇꯧꯐꯝ ꯈꯪꯗꯦ꯫ ꯃꯄꯥꯒꯤ ꯃꯅꯥꯛꯇ ꯆꯦꯟꯆꯠ ꯆꯠꯇꯨꯅ ꯂꯥꯛꯏ꯫
“ꯅꯆꯥꯅꯨꯄꯤꯁꯤꯡꯁꯦ꫰ ꯂꯥꯏ ꯑꯣꯛꯅꯔꯕ꯭ꯔ ꯀꯩꯅꯣꯃ ꯏꯇꯧ ꯇꯧꯏ꯫ ꯃꯥꯏꯕ ꯇꯥꯟꯕꯅ ꯐꯔꯤꯕ꯭ꯔ꫰ ꯅꯠꯇ꯭ꯔꯒ ꯁꯥꯏꯀ꯭ꯌꯥꯇ꯭ꯔꯤꯛ ꯗꯣꯛꯇꯔ ꯑꯃꯗ ꯌ ꯦꯡꯍꯟꯕꯅ ꯐꯒꯗ꯭ꯔ ꯑꯃꯨꯛꯇ ꯈꯟꯅꯁꯤ”꯫
ꯃꯄꯥꯗꯨ ꯍꯤꯗꯥꯛ ꯍꯥꯏꯔꯞ ꯉꯥꯎꯔꯒ ꯇꯤ ꯚꯤꯗ ꯐꯦꯁꯟ ꯁꯣ ꯑꯃ ꯌꯦꯡꯗꯨꯅ ꯂꯩꯔꯝꯃꯤ꯫
“ꯀꯩꯗꯧꯔꯦ ꯍꯥꯏꯕ꫱”
“ꯃꯣꯏꯁꯤ ꯋꯥꯈꯜ ꯏꯔꯩ ꯂꯩꯇꯥꯗꯕ꫰ ꯏꯉꯥꯎ ꯉꯥꯎꯕꯗꯧꯅ ꯇꯧꯏ꫰ ꯀꯩꯅꯣ ꯑꯩꯁꯨ ꯍꯥꯏꯐꯝ ꯈꯪꯗꯦ”
ꯀꯌꯥꯝ ꯀꯨꯏꯔꯦ꫱
“ꯉꯁꯤ ꯃꯔꯤꯅꯤ ꯁꯨꯔꯦ꫰ ꯆꯥꯛꯁꯨ ꯅꯤꯡꯊꯤ ꯅꯨꯡꯉꯥꯏꯅ ꯆꯥꯗꯦ꯫ ꯑꯌꯨꯛꯇ ꯈꯤꯜꯂꯝꯕ ꯆꯥꯛ ꯑꯃꯠꯇ ꯆꯥꯔꯝꯗꯦ꫰ ꯃꯆꯤ ꯃꯆꯤ ꯈꯨꯗꯤꯡꯗ ꯎꯪ ꯎꯪꯗꯨꯅ ꯂꯩ”
ꯃꯄꯥꯅ ꯇꯤ ꯚꯤ ꯌꯦꯡꯅ ꯌꯦꯡꯅ ꯋꯥꯈꯜ ꯈꯜꯂꯒ ꯊꯧ-ꯋꯥ ꯏꯁꯥ ꯁꯥꯗꯅ ꯂꯩ꯫ ꯃꯗꯨ ꯎꯕꯗ ꯏꯕꯦꯊꯣꯏꯗꯤ ꯃꯩ ꯍꯧꯈꯩ ꯁꯥꯎꯔꯦ꯫
“ꯀꯩꯅꯣ ꯅꯆꯥꯈꯩꯅ ꯉꯥꯎꯗꯨꯅ ꯂꯩꯔꯒ ꯃꯄꯥꯅ ꯁꯣꯝꯗ ꯌꯨ ꯑꯣꯏꯅ ꯉꯥꯎꯔꯒ ꯊꯧꯋꯥ ꯁꯥꯗ꯭ꯔꯤꯁꯤꯕꯣ꫱ ꯉꯥꯎ ꯐꯩꯗꯅ ꯁꯣꯔꯣꯛ ꯊꯣꯛꯈ꯭ꯔꯗꯤ ꯀꯃꯥꯏ ꯇꯧꯗꯨꯏꯅꯣ꫰ ꯍꯧꯒꯠꯂꯣ ꯃꯥꯏꯕ ꯑꯃꯠꯇ ꯍꯥꯟꯅ ꯀꯧꯕꯤꯔꯨꯆꯣ꫱”
“ꯀꯩꯁꯨ ꯇꯧꯔꯣꯏ ꯍꯥꯏꯕꯅꯤ꫰ ꯍꯌꯦꯡ ꯅꯠꯇ꯭ꯔꯒ ꯍꯪꯆꯤꯠ ꯁꯣꯗꯅ ꯐꯅꯤ꫰ ꯃꯣꯏ ꯂꯥꯏꯅꯥꯗꯨ ꯑꯩ ꯈꯪꯏ꫰ ꯇꯨꯃꯤꯟ ꯂꯩꯌꯨ꫰ ꯃꯤꯁ ꯋꯥꯔꯜ ꯈꯟꯕꯒꯤ ꯄ꯭ꯔꯣꯒ꯭ꯔꯥꯝꯁꯤ ꯑꯩ ꯑꯃꯨꯛꯇ ꯐꯖꯅ ꯌꯦꯡꯒꯦ꯫ ꯏꯕꯦꯊꯣꯏ꫰ ꯅꯣꯏ ꯅꯆꯥꯈꯩꯅ ꯇꯧꯔꯤꯗꯣ ꯉꯥꯎꯔꯤꯅꯤ ꯀꯣ꫰ ꯉꯥꯎꯔꯤꯅꯤ꫱”
“ꯀꯩꯅꯣ ꯃꯣꯏ ꯃꯄꯥꯕꯨ ꯗꯣꯛꯇꯔꯔꯣ꫱ ꯅꯆꯥꯈꯩꯅ ꯉꯥꯎꯅ-ꯐꯩꯅ ꯂꯩꯔꯒ꫰ ꯀꯩꯃꯇ ꯊꯧꯋꯥ ꯁꯥꯗ꯭ꯔꯤꯁꯤꯕꯨ ꯀꯩꯒꯤꯅꯣ꫱”
“ꯍꯦ! ꯃꯣꯏꯅ ꯉꯥꯎꯔꯤꯗꯨ ꯂꯥꯏ ꯑꯣꯛꯅꯕꯒꯤ ꯅꯠꯇꯦ꫰ ꯍꯣꯏ ꯁꯥꯏꯀ꯭ꯌ ꯥꯇ꯭ꯔꯤꯛꯕꯨꯗꯤ ꯃꯔꯤ ꯈꯔ ꯂꯩꯅꯩ꫰ ꯒꯚꯔꯟꯃꯦꯟꯠꯅ ꯃꯣꯕꯥꯏꯜ ꯗꯦꯇꯥ ꯊꯤꯡꯖꯤꯟꯈꯤꯕꯗꯣ ꯑꯗꯨꯗ ꯉꯥꯎꯔꯤꯅꯤ꫰ ꯈꯪꯉꯕꯔ꯫ ꯍꯌꯦꯡꯂ ꯍꯪꯆꯤꯠꯂ ꯍꯥꯡꯅꯤ ꯍꯥꯏꯕꯅ꫰ ꯑꯗꯨꯗ ꯃꯥꯏꯅ ꯐꯖꯅꯤ꫰ ꯆꯠꯂꯣ ꯑꯥꯗꯥ꫰ ꯑꯩ ꯇꯤ ꯚꯤ ꯉꯥꯏꯍꯥꯛꯇ ꯌꯦꯡꯒꯦ꫰ ꯀꯩꯁꯨ ꯇꯧꯔꯣꯏꯀꯣ”
“ꯍꯩꯃꯥ꫰ ꯑꯗꯨꯒꯤꯔꯥꯅꯦ꫰ ꯑꯁꯦꯡꯕꯔꯅꯦ ꯍꯥꯏꯔꯤꯁꯤꯕꯣ꫱ ꯑꯗꯨꯗꯤ ꯁꯤꯒꯤ ꯀꯝꯄꯦꯟꯁꯦꯁꯟꯁꯤꯗꯤ ꯒꯚꯔꯟꯃꯦꯟꯠꯇ ꯇꯥꯅꯒꯗꯕꯅꯤ꫰ ꯀꯔꯤꯒꯨꯝꯕ ꯗꯦꯇꯥ ꯍꯥꯡꯂꯀꯥꯟꯗ ꯏꯆꯥꯈꯩꯅ ꯐꯔꯈ꯭ꯔꯗꯤ ꯐꯩ꫰ ꯐꯠꯇ꯭ꯔꯗꯤ꫰ ꯏꯆꯥ ꯉꯥꯎꯍꯟꯕꯒꯤ ꯀꯝꯄꯦꯟꯁꯦꯁꯟ ꯇꯥꯟꯒꯗꯕꯅꯤ꫰ ꯈꯪꯒꯅꯤꯗꯅ ꯍꯦ! ꯒꯚꯔꯟꯃꯦꯟꯠ’꯫ ꯃꯄꯥꯅ ꯄꯩꯔꯞꯅ ꯃꯥꯒꯤ ꯅꯨꯄꯤꯅ ꯍꯥꯏꯔꯤ ꯋꯥꯗꯨ ꯅꯣꯛꯐꯦꯠ ꯇꯧꯅ ꯌꯦꯡꯂꯛꯏ꫰ “ꯍꯦ ꯃꯤ ꯇꯥꯅꯤ ꯏꯀꯥꯏꯀꯣ꫰ ꯏꯀꯥꯏ ꯍꯥꯏꯁꯤꯅꯤ”꯫

ꯂꯧꯔꯛꯐꯝ

• ꯅꯔꯦꯟꯗ꯭ꯔ ꯅꯤꯉꯣꯝꯕ (ꯋꯥꯔꯤ ꯀꯛꯅꯥꯎ)
• ꯍꯨꯌꯦꯟ ꯂꯥꯟꯄꯥꯎ, ꯲꯱ ꯁꯦꯞꯇꯦꯝꯕꯔ ꯲꯰꯱꯸