ꯕꯦꯡꯒꯂꯤ ꯃꯌꯦꯛ:ইস্তারা
 |
ইস্তারা (সুমেরীয়নগী লাইরীক্সীংদা ইনান্না) অসী নুংসীবা অমসুং লানগা য়াম্না নক্না মরী লৈনবা মরুওইবা মেসোপোতেমীয়াগী লাইরেম্বী অমনী। মসীগী মপাংগল্ কন্বা মেসোপোতেমীয়াগী লাইরেম্বী অসী ঐখোইনা খুদম্-চাংদম্ ইখীবা অহান্বা খংনরবা লাইনী। অনৌবা মতম্দা অয়াম্বনা খংবা ঙম্দ্রবসু, মপাংগল্ কন্বা অরীবা লাই অসীনা অরীবা মনাক্ নক্পা নোংপোক্কী ধরমাসীং অমসুং চৎনবীসীংদা অরুবা অমসুং ইথীল্ পীবা থৌদাং অমা লৌখী। অরীবা মালেম্দা, ইনান্না/ইস্তারগী মরুওইবা অদু হেনজীন্না হাইবদা অৱাবা ওই। খ্বাইদগী মমীং চৎপা মেসোপোতেমীয়াগী লাইরেম্বী ওইনা, মহাক্কী মসক্ থোক্পা ইথীল্ অসী মহাক্কী লাই খুরুম্বসীংগী পুন্সীগী মসক্ কয়াদা য়াওখী, অমসুং মহাক্পু চহী লীসীং কয়াগী পুৱারীগী মতম্ অমগীদমক্ অরীবা অনক্পা নোংপোক্কী পাক্-চাওরবা লম্মীৎ-তুমীৎকী মফম্ কয়াদা ইকাই খুম্নখী। ইস্তারা অসী অরুবা সীভীলাইজেসন্সীংগী পুৱারীদা য়াম্না ঙল্লীঙৈ মতম্দগী লাক্পনী, মহাক্কী চৎনবী অসী খ্রীস্তগী মমাংগী ৪ সুবা মীলেনীয়ম্গী অথেংবদা উরুক্তা উৎখী ।[꯱][꯲][꯳][꯴]
মরুওইবা[ꯁꯦꯝꯒꯠꯂꯨ | ꯁꯦꯝꯒꯠꯂꯛꯄꯒꯤ ꯍꯧꯔꯛꯐꯝ]
ইস্তারগী খুদম্-চাংদম্ অসী মহৌসানা তীগ্রীসা অমসুং য়ুফ্রেতীসা তুরেল্সীংগী মরক্তা লম্মীৎলোনগী ওইনা থম্মী হাইনা লৌনরীবা অরীবা অনক্পা নোংপোক্কী মফম্ অমা ওইরীবা মেসোপোতেমীয়াদগী লাক্ই। মেসোপোতেমীয়াগী চপ্ চাবা লম্খৈগী চাংগী মতাংদা খন্ন-নৈনবা কয়া লৈরবসু, মসী হৌজীক্ মতম্গী ইরাক্, কুৱেৎ অমসুং সীরীয়া, ইরান্ অমসুং তরকীগী সরুক্ খরগা চাওরাক্না চান্নৈ হাইনা লৌনৈ। মেসোপোতেমীয়া অসী অক্কাদীয়ন্, বেবীলোনীয়ন্ অমসুং অসীরীয়ান্ নীংথৌরেল্ লৈবাক্সীং য়াওনা মালেম্গী অহান্বা অচৌবা নীংথৌরেল্ লৈবাক্ কয়াগী ময়ুম্ ওইরম্মী। ইস্তারনা মমীং লৈরবা গ্রীক্কী নুংসীবগী লাইরেম্বী, এফ্রোদাইৎ, অমসুং অস্তার্ৎগুম্বা অতোপ্পা মমীং লৈরবা লাইরেম্বীসীং য়াওনা মতুং তারক্পা লাইরেম্বী কয়াগী মীতম্সীং অমসুং চৎনবীসীংদা য়াম্না চাওনা ইথীল্ পীখী। ক্লাসীকেল্ মতম্গী লাইরেম্বী কয়া, হাইবদী এফ্রোদাইৎ, আরতেমীসা, অমসুং এথেনানা মখা তানা মরুওইবা নাৎকী খুদম্সীং ওইনা মথৌ তৌদুনা লাক্লী। ইস্তারনা, চাংদম্নবদা, মহাক্কী সক্তম্গা মান্নবা পুন্সী সাংবা ফংখীদে। অরীবা মেসোপোতেমীয়াগী লাইসীংগী মনুংদা খ্বাইদগী তোইনা উৎলীবা লাইসীংগী মনুংদা অমা ওইবদগী মহাক্ চাওরাক্না মপুং ফানা মসক্ খংদবা ফীভম্দা তারে। ইস্তারনা হৌজীক্ মতম্গী মীংচৎ খংদবা অসী মরম্ কয়াদগী থোক্খীবা ওইরম্বা য়াই অদুবু খ্বাইদগী থাজবা য়াবা মওংদা ক্যুনীফোর্ম্ অইবগী পথাপ্ মাংখীবগা মরী লৈনহন্বা য়াই। চহী ৩,০০০ হেন্না ক্যুনীফোর্ম্ অসী এন্সীয়েনৎ নীয়রা ইস্ৎ সীন্বা থুংনা অমসুং মেদীতেরেনীয়নগী সরুক্ খরদা পাও ফাওনবগী মরুওইবা পাম্বৈ ওইখী। অহোংবা অসীদা য়াওরীবা থৌওংসীং অসী ময়েক্ সেংনা লৈরবসু মসী চাওরাক্না খ্রীস্ৎ কুম্জা ৪০০দা সীজীন্নবদগী হন্থরক্খী। অরীবা মালেম্দা ইস্তারগী ইথীল্ অসী মহাক্কী অরীবা ৱারীসীং অমসুং তুংদা লাক্কদৌবা ৱাফম্সীং চেজন্নবা সীজীন্নরীবা ময়েক্ অদুগা লোইননা হন্থরক্খী।[꯱][꯲][꯳][꯴]
হৌরক্ফম্সীং[ꯁꯦꯝꯒꯠꯂꯨ | ꯁꯦꯝꯒꯠꯂꯛꯄꯒꯤ ꯍꯧꯔꯛꯐꯝ]
ইনান্না/ইস্তারা অসী থাইনগী ৱারীসীংদা এন্থ্রোপোমোরফীকেল্ ওইনা তোইনা উৎলী। সুমেরীয়াগী নুংসীবগী সৈরেংদা মহাক্পু মহাক্কী মমা নীংগল্ অমসুং মহাক্কী মপা নন্না (মেসোপোতেমীয়াগী থাগী লাই, সীন্)গা লোইননা য়ুম্দা লৈবা নহা ওইরীবা নুপী অমা ওইনা উৎলী। মহাক্কী মনাওনুপা ফাইবোক্ অসী অচুম্বা ৱায়েল্গী ৱাখল্লোনগা মরী লৈনবা সোলরগী লাই উতু (সেমীতীক্ সমাস)নী। ইস্তারা মসামক্ অতীয়াগী ওইবা পোৎসক্ অমগসু মরী লৈনৈ: ভীনসা, অয়ুক্ অমসুং নুমীদাংৱাইরম্গী স্তারনী। লাইরেম্বী অদুগী লুহোংবগী লোইনবী অসী দুমুজী (সেমীতীক্ তম্মুজ)নী, মহাক্ অরীবা ৱারীসীংদা য়াওসেন্বী নীংথৌ অমা ওইনা উবা ফংই। দুমুজীগী মমানা লাইরেম্বী দৎতুরনী, অমসুং মহাক্কী মচেনা গেসতীনন্নানী। ইস্তারগী অরীবা লীখুন্সীং অসী পাক্ সন্না সন্দোক্লবসু, মচেৎ খরা, মপুং ফাদবা, অমসুং মরী লৈনবা মতাংদা তাক্পদা অৱাবা ওই। ইস্তারগীদমক্তা প্রমান্সীংগী খুদোংথীনীংঙাই ওইবা মৱোং অসী লাইরেম্বী অদুগী অৱাংবা থাক্কী মতাংদা, অমসুং অরীবা মালেম্দা মহাক্কী মতম্ চুপ্পগী ওইবা ইথীল্গী মতুং ইন্না খন্নরক্পা মতম্দা অঙক্পা ওই। খুদম্ চাংদম্ অসীদা লৈরীবা অৱাবসীং অসী অয়াম্বনা (অখন্ননা নৎত্রবসু) লাইরেম্বী অদুগী অরীবা মতম্গী মহৈনী হাইনা লৌবা য়াই। অরীবা সাহীত্যগী লীখুন্সীংগী মনুংদা, লাইরেম্বী অসী মেসোপোতেমীয়াদগী খ্বাইদগী মমীং চৎপা অরীবা ৱারী অনী: গীল্গামেসকী এপীক্, অমসুং ইস্তারগী দীসেন্তা তু দা নেদরৱরল্দতা মহাক্কী সক্তম্ লাংবগীদমক্ খ্বাইদগী মমীং চৎলী।[꯱][꯲][꯳][꯴]